యాక్షన్‌ హీరో అర్జున్‌ సర్జా తమిళనాడులోని చెన్నైలో ఆంజనేయస్వామి ఆలయం నిర్మించాడు. 15 ఏళ్ల క్రితం తలపెట్టిన గుడి నిర్మాణం ఇప్పుడు పూర్తయిందని ఆయన చెప్పుకొచ్చాడు. ఈ మేరకు సోషల్‌ మీడియాలో వీడియో విడుదల చేశాడు. ”నేను 15 ఏళ్లుగా నిర్మిస్తున్న ఆంజనేయస్వామి గుడి నిర్మాణం పూర్తయింది. ఈ సందర్భంగా జూలై 1, 2 తారీఖుల్లో కుంభాభిషేకం జరుపుతున్నాం”
“నా కుటుంబం, స్నేహితులు, అభిమానులు అందరినీ పిలిచి ఈ వేడుకను చాలా గ్రాండ్‌గా చేద్దామనుకున్నా. కానీ కరోనా పరిస్థితుల వల్ల ఎవరికీ ఆహ్వానం పంపలేకపోతున్నా. అయినప్పటికీ ఈ వేడుకను ఎవరూ మిస్‌ కావద్దన్న ఉద్దేశ్యంతో దీన్ని లైవ్‌ స్ట్రీమ్‌ చేస్తున్నాం” అని చెప్పుకొచ్చాడు. కాగా అర్జున్‌ ప్రస్తుతం సూపర్‌స్టార్‌ మహేష్‌ బాబు హీరోగా నటిస్తున్న’సర్కారు వారి పాట’ సినిమాలో పవర్‌ఫుల్‌ పోలీసాఫీసర్‌లా నటిస్తున్నట్లు సమాచారం.
