రామ్‌ చరణ్‌ హీరోగా నటిస్తున్న తాజా చిత్రం ‘గేమ్‌ ఛేంజర్’. కోలీవుడ్‌ స్టార్‌ డైరెక్టర్‌ శంకర్‌ దర్శకత్వంలో వస్తున్న ఈ సినిమా షూటింగ్ ప్ర‌స్తుతం శ‌ర‌వేగంగా జ‌రుపుకుంటుంది. ఇక ఈ సినిమా తరువాత చరణ్‌ ఉప్పెన డైరెక్టర్‌ బుచ్చిబాబు సన తో సినిమా చేయనున్నాడు. ఇప్ప‌టికే ఈ ప్రాజెక్ట్‌కు సంబంధించి ప్రీ ప్రోడ‌క్ష‌న్స్ ప‌నులు జ‌రుగుతుండ‌గా త్వర‌లోనే షూటింగ్ ప్రారంభంకానుంది.
ఇదిలావుంటే తాజాగా ఈ మూవీ నుంచి సాలిడ్ అప్‌డేట్ ఇచ్చారు మేకర్స్. ఈ రోజు ప్రముఖ సంగీత దర్శకుడు ఎ.ఆర్‌. రెహమాన్ పుట్టిన‌రోజు. ఈ సంద‌ర్భంగా త్వరలో తెరకెక్కనున్న RC16 సినిమాకి ఎ.ఆర్‌. రెహమాన్ సంగీతం అందించ‌బోతున్న‌ట్లు మైత్రి మూవీ మేకర్స్ ప్ర‌క‌టించారు. ఇంకా టైటిల్ ఫిక్స్ కానీ ఈ సినిమా స్పోర్ట్స్ డ్రామా నేపథ్యంలో రాబోతుంది.
కిలారు వెంకట సతీశ్‌ నిర్మించనున్న ఈసినిమా సెప్టెంబర్ నుంచి షురూ కానుందని సమాచారం. ఈ చిత్రాన్ని సుకుమార్‌-మైత్రీ మూవీ మేకర్స్ సంయుక్తంగా తెరకెక్కించనున్నాయి. ఏఆర్ రెహమాన్ బ్యాక్‌గ్రౌండ్ స్కోర్, మ్యూజిక్ అందించబోతున్నాడు. గేమ్‌ ఛేంజర్ సెట్స్‌పై ఉండగానే మరో సినిమా అప్‌డేట్ రావడంతో ఆనందంలో ఎగిరిగంతేస్తున్నారు మెగా అభిమానులు.
