నేచురల్‌ స్టార్ నాని హీరోగా నటిస్తున్న తాజా చిత్రం ‘అంటే సుందరానికీ’. మలయాళ హీరోయిన్‌ నజ్రియా నజీమ్‌ హీరోయిన్‌గా నటిస్తున్న ఈ సినిమాకి వివేక్‌ ఆత్రేయ దర్శకత్వం వహిస్తున్నారు. ఈ మూవీని మైత్రీ మూవీ మేకర్స్‌ బ్యానర్‌పై నవీన్‌ యెర్నేని, వై.రవిశంకర్‌లు సంయుక్తంగా నిర్మిస్తున్నారు. ఫ్యామిలీ అండ్‌ కామెడీ ఎంటర్‌టైనర్‌గా తెరకెక్కుతున్న ఈ సినిమా నుంచి బుధవారం టీజర్‌ రిలీజైంది.
సుందర్‌ ప్రసాద్‌ మీ అబ్బాయే కదండీ అన్న డైలాగ్‌తో టీజర్‌ మొదలవుతుంది. గండాలు ఉన్నాయంటూ హీరోతో పూజల మీద పూజలు చేయించడమే కాక ఏకంగా నాలుకకు వాత పెట్టే సన్నివేశాలు బాగున్నాయి. పక్కా ఆచారి అయిన హీరో సుందర్‌.. క్రైస్తవ అమ్మాయి లీలాను ప్రేమించడంతో అసలు కథ మొదలైనట్లు తెలుస్తోంది. మత ఆచారాలకు కట్టుబడి ఉండే ఇరు కుటుంబాలను ఒప్పించడానికి హీరోహీరోయిన్లు ఎన్ని తిప్పలు పడ్డారు? అసలు వీరి పెళ్లి జరిగిందా? లేదా? అన్నది తెలియాలంటే సినిమా చూడాల్సిందే! వివేక్‌ సాగర్‌ సంగీతం అందిస్తున్న ఈ మూవీ జూన్‌ 10న థియేటర్లలో రిలీజ్‌ అవుతోంది.
