‘సరిలేరు నీకెవ్వరు’ దర్శకుడు అనిల్‌ రావిపూడి సినిమాకు అద్భుతమైన స్పందన వస్తోందని, చెప్పినట్లే బొమ్మదద్దరిల్లిందని ఆనందం వ్యక్తం చేశారు. సూపర్‌స్టార్‌ మహేష్‌బాబు హీరోగా నటించిన ఈ సినిమా శుక్రవారం ప్రేక్షకుల ముందుకొచ్చింది. హైదరాబాద్‌లోని శ్రీ రాములు థియేటర్‌లో చిత్ర బృందం అభిమానులతో కలిసి తొలి ఆటను వీక్షించింది. అనిల్‌తోపాటు కథానాయిక రష్మిక, నటి సంగీత, దేవిశ్రీ తదితరులు మార్నింగ్‌ షో చూశారు. థియేటర్‌లో రష్మికను చూసిన ఫ్యాన్స్‌ కేకలు పెట్టి, గోల చేశారు. వారందరినీ ఆమె పలకరించారు.
ఈ సందర్భంగా అనిల్‌ మీడియాతో మాట్లాడారు. ‘సినిమాకు విశేషమైన స్పందన వచ్చింది. తెలంగాణతోపాటు ఆంధ్రప్రదేశ్‌ నుంచి కూడా బ్లాక్‌బస్టర్‌ రెస్పాన్స్‌ వచ్చింది. ఇప్పుడే శ్రీరాములు థియేటర్‌లో షో చూశాం. విరామ సన్నివేశం సమయంలో ఒళ్లుగగుర్పొడిచిందని అంటున్నారు. రైలు ఎపిసోడ్‌ వచ్చినప్పుడు ఎవరూ సీటులో కూర్చోవడం లేదు.. పడిపడి నవ్వుతున్నారు. ఈ సంక్రాంతి నవ్వులతో నిండిపోతుందని ఆశిస్తున్నా. స్పందన మామూలుగా లేదు.. దద్దరిల్లిపోయిందంతే’ అని అన్నారు.
