‘పుష్ప’ సినిమాతో అల్లు అర్జున్ పాన్ ఇండియా హీరోగా మారిపోయిన సంగతి తెలిసిందే. ప్రస్తుతం ‘పుష్ప ది రూల్’ షూటింగ్తో బిజీగా ఉన్న ఆయన నెక్స్ట్ లైనప్ గురించి టాలీవుడ్ ప్రస్తుతం ఇంట్రెస్టింగ్గా మారింది. గత కొద్ది రోజులుగా అట్లీ అల్లు అర్జున్ కాంబోలో ఓ సినిమా ఉంటుందని ప్రచారం సాగుతోంది. అయితే తాజాగా అది దాదాపుగా కన్ఫామ్ అయినట్లు తెలుస్తుంది.
వివరాళ్లోకి వెళితే.. డైరెక్టర్ అట్లీ తాజాగా ‘జవాన్’ సినిమాతో భారీ హిట్ను తన ఖాతాలో వేసుకున్నారు. ఈ చిత్రం బాక్సాఫీస్ వద్ద వసూళ్ల మోత మోగిస్తూ దుసుకెళ్తోంది. ఇదే సమయంలో అట్లీ .. తన తర్వాతి సినిమాను అల్లు అర్జున్తో కలిసి చేస్తారన్న టాక్ కూడా ఎక్కువగా వినిపిస్తోంది. కానీ అఫీషియల్ అనౌన్స్మెంట్ రాలేదు. అయితే తాజాగా అల్లు అర్జున్ చేసిన ఓ ట్వీట్తో ఈ టాపిక్ మరోసారి తెరపైకి వచ్చింది. ‘జవాన్’ సక్సెస్పై బన్నీ స్పందిస్తూ మూవీటీమ్కు ప్రత్యేకంగా అభినందనలు తెలిపారు. హీరో షారుక్ ఖాన్తో పాటు విజయ్ సేతుపతి, నయనతార, దీపికా పదుకొణె, మ్యూజిక్ డైరెక్టర్ అనిరుధ్ రవిచందర్, దర్శకుడు అట్లీని పేరు పేరున కొనియాడారు.
అయితే ఈ ట్వీట్పై సంగీత దర్శకుడు అనిరుధ్ ‘థాంక్యూ మై బ్రో’ అంటూ రియాక్ట్ అయ్యాడు. దానికి బన్నీ.. ‘థాంక్యూ సరిపోదు.. నాకు మంచి పాటలు కావాలి’ అంటూ అనిరుధ్ ట్వీట్కు బదులిచ్చారు. ఈ ట్వీట్ కాస్త సోషల్‌ మీడియాలో వైరల్ అవుతుంది. దీంతో అట్లీ-అర్జున్-అనిరుధ్(AAA) కాంబో కన్ఫామ్ వార్తలు వినిపిస్తున్నాయి. ఇప్పటి వరకు రూమర్స్ అనుకుంటున్న ఈ విషయాన్ని బన్నీ రిప్లైతో కన్ఫామ్ చేసేశారంటూ ఫ్యాన్స్‌ సంతోషం వ్యక్తం చేస్తున్నారు. ప్రస్తుతం అల్లు అర్జున్ ‘పుష్ప 2’ సినిమా చేస్తున్నాడు. తర్వాత సందీప్ వంగతో చేయనున్నారు. ఆ తర్వాతే అట్లీతో సినిమా ఉంటుందని టాక్ వినిపిస్తోంది. మరి దీనిపై క్లారిటీ రావాల్సి ఉంది.
