దగ్గుబాటి వారసుడు, హీరో రానా తమ్ముడు అభిరామ్ హీరోగా ఎంట్రీ ఇస్తున్న చిత్రం ‘అహింస’. ఆనంది ఆర్ట్ క్రియేషన్స్ బ్యానర్ పై డైరెక్టర్‌ తేజ ఈ సినిమాని తెరకెక్కిస్తున్నారు. తాజాగా ఈ సినిమా నుంచి టీజర్ ను విడుదల చేశారు. ఇది ఒక పల్లెటూరి నేపథ్యంలో సాగే స్వచ్ఛమైన ప్రేమకథ అనే విషయం ఈ టీజర్ ద్వారా అర్థమవుతోంది. రఘు – అహల్య బావా మరదళ్లు. ఒకరంటే ఒకరికి ఇష్టం .. ప్రేమ. అమాయకుడైన రఘును అహల్య అపురూపంగా చూసుకుంటూ ఉంటుంది. అలాంటివారి జీవితం అల్లకల్లోలమవుతుందనే విషయాన్ని టీజర్ చెబుతోంది.
అందుకు కారకులు ఎవరు? ఆ పరిస్థితులను ఆ ప్రేమికులు ఎలా తట్టుకుని నిలబడ్డారు? అనేదే కథ అనే విషయం స్పష్టమవుతోంది. గీతిక ఈ సినిమాతో హీరోగా పరిచయమవుతోంది. సదా .. రజత్ బేడీ ముఖ్యమైన పాత్రలలో కనిపించనున్నారు. ఈ సినిమాతో ఆర్పీ పట్నాయక్ రీ ఎంట్రీ ఇస్తుండటం విశేషం.
