ఆది సాయికుమార్, అవికా గోర్ హీరో, హీరోయిన్‌లుగా నటిస్తున్న చిత్రం ‘అమరన్’. జెమినీ సమర్పణలో ఎస్వీఆర్ ప్రొడక్షన్స్ బ్యానర్ లో నిర్మితమౌతున్న సినిమా తో ఎస్. బలవీర్ దర్శకుడిగా పరిచయం అవుతున్నాడు. శనివారం పూజా కార్యక్రమాలతో ఈ సినిమా మొదలైంది. హీరోహీరోయిన్లపై చిత్రీకరించిన ముహూర్తపు సన్నివేశానికి సాయికుమార్ క్లాప్ నివ్వగా, జెమినీ మూర్తి కెమెరా స్విచ్చాన్ చేశారు. వీరభద్రం చౌదరి గౌరవ దర్శకత్వం వహించారు. ‘ఇప్పటి వరకూ ఎవరూ టచ్ చేయని ఇన్నోవేటివ్, యూనిక్ పాయింట్ తో ఈ సినిమా ఉంటుందని, ఆది సాయికుమార్ సరికొత్త లుక్ తో కనిపిస్తారని, ఆ పాత్రలో కొంత కామిక్ టచ్ కూడా ఉంటుందని దర్శకుడు బలవీర్ తెలిపాడు. ప్రేక్షకులను ఎంగేజ్ చేసే కథాంశంతో థ్రిల్లర్, ఫాంటసీ ఎలిమెంట్స్ తో ఈ సినిమా ఉంటుందని నిర్మాత ఎస్వీఆర్ చెప్పారు. ఆదిత్య ఓమ్, కృష్ణుడు, మనోజ్ నందన్, వీరశంకర్, పవిత్రాలోకేశ్, మధుమణి ఈ సినిమాలో కీలక పాత్రలు పోషించబోతున్నారు. కృష్ణచైతన్య సంగీతం అందిస్తున్నాడు.
