యంగ్ టైగర్ ఎన్టీఆర్ ఇండస్ట్రీలోకి వచ్చి రెండు దశాబ్దాలు పూర్తికావొస్తోంది. ఈ సందర్భంగా 20 ఇయర్స్ ఆఫ్ ఎన్టీఆర్ అంటూ అభిమానులు వరుస ట్వీట్లు చేస్తున్నారు. బాల నటుడిగా రెండు సినిమాల్లో నటించినా ‘నిన్ను చూడాలని’ చిత్రంతో హీరోగా ఎంట్రీ ఇచ్చాడు. స్టూడెంట్ నెంబర్ 1 చిత్రంతో ఘన విజయం అందుకున్నాడు. ఆ తర్వాత ఎన్నో చిత్రాల్లో నటించి ప్రేక్షకులను మెప్పించాడు. ఎన్టీఆర్ బాలనటుడిగా ‘బాల రామాయణం’ ‘బ్రహ్మర్షి విశ్వామిత్ర’ హిందీ వెర్షన్‌లో నటించాడు. బాల రామాయణం సినిమాకు నంది అవార్డు అందుకున్నాడు. బ్రహ్మర్షి విశ్వామిత్ర హిందీ వెర్షన్ విడుదల కాలేదు. ఎన్టీఆర్ ఇండస్ట్రీకి వచ్చి ఈ ఏడాదితో 20 ఏళ్లు పూర్తికావస్తున్నందున కామన్ డీపీ ఒకటి వైరల్ అవుతోంది. ఇప్పటివరకు ఎన్టీఆర్ చేసిన క్యారెక్టర్లను పొందుపరుస్తూ ఓ కాయిన్ రూపంలో కామన్ డీపీని తయారు చేశారు. ప్రస్తుతం సోషల్ మీడియాలో ఇది వైరల్‌గా మారింది. ఎన్టీఆర్ ప్రస్తుతం రాజమౌళి తెరకెక్కిస్తున్న ఆర్ఆర్ఆర్ మూవీలో కొమురం భీమ్ పాత్రలో కనిపించనున్నాడు. రాజమౌళి చిత్రం తర్వాత త్రివిక్రమ్ దర్శకత్వంలో మరో సినిమా చేయబోతున్నాడు.
