సంపత్‌ నంది -హెబ్బాపటేల్‌ కాంబినేషన్లో వచ్చిన బ్లాక్ బస్టర్‌ చిత్రం ‘ఓదెల రైల్వే స్టేషన్’. ఈ సినిమాకి సీక్వెల్‌ ఓదెల 2 తెరకెక్కుతున్న సంగతి తెలిసిందే. ఈ సీక్వెల్‌ మిల్కీ బ్యూటీ తమన్నా ప్రధాన పాత్రలో నటిస్తుంది. ఇటీవలే ఓదెల 2 షూటింగ్‌ను ప్రముఖ ఆధ్యాత్మిక పుణ్యక్షేత్రం కాశీలో మొదలుపెట్టారు. ఈ రోజు మహాశివరాత్రిని పురస్కరించుకొని మేకర్స్‌ కొత్త పోస్టర్‌ విడుదల చేశారు.
అందరికీ మహాశివరాత్రి శుభాకాంక్షలు.. ఓం నమ: శివాయ.. అంటూ తమన్నా స్పెషల్‌ లుక్‌ షేర్ చేశారు. ఇప్పటివరకు గ్లామరస్‌, స్టైలిష్ రోల్స్‌లో నటించిన తమన్నా ఈ సారి మాత్రం రూట్‌ మార్చేసింది. ఓదెల 2 సినిమా కోసం శివశక్తిగా మారిపోయింది. శివశక్తి లుక్‌ ఇప్పుడు నెట్టింటిని షేక్ చేస్తోంది. ఇందులో తమన్నా మహదేవ్‌కు పరమభక్తురాలిగా, ఓదెల సద్గుణ రక్షకురాలిగా కనిపించబోతుందని తెలియజేశారు మేకర్స్‌ .
ఓదెల 2లో వశిష్ఠ ఎన్‌ సింహా, హరిప్రియ ఇతర ప్రధాన పాత్రలు పోషిస్తున్నారు. అశోక్‌ తేజ డైరెక్ట్ చేస్తున్న ఈ మూవీని సంపత్‌ నంది టీమ్‌ వర్క్స్‌ బ్యానర్‌, మధు క్రియేషన్స్‌పై తెరకెక్కిస్తున్నారు.ఈ సినిమాకి కాంతార చిత్రానికి అదిరిపోయే మ్యూజిక్‌, బ్యాక్‌ గ్రౌండ్‌ స్కోర్ అందించిన అజనీష్‌ లోక్‌నాథ్‌ సంగీతం అందిస్తుండటంతో అంచనాలు అమాంతం పెరిగిపోతున్నాయి.
