టాలీవుడ్‌ యంగ్‌ హీరో నిఖిల్‌, అనుపమ పరమేశ్వరన్‌ ప్రధాన పాత్రల్లో నటిస్తున్న చిత్రం ‘18 పేజీస్‌’. విభిన్నమైన ప్రేమ కథతో యూత్‌ఫుల్‌ లవ్‌ ఎంటర్‌టైనర్‌గా ఈ సినిమా సిద్ధమవుతోంది. ఈ సినిమా విడుదల తేదీపై తాజాగా చిత్రబృందం స్పందించింది. వచ్చే ఏడాది ఫిబ్రవరి 18న ‘18 పేజీస్‌’ చిత్రాన్ని థియేటర్లలో విడుదల చేయనున్నట్లు ప్రకటించింది. ‘‘ఒకవేళ ఓ ఫోన్‌.. పుస్తకంతో ప్రేమలో పడితే.. ఎలా ఉంటుందో చూడాలనుకుంటున్నారా? అయితే, 18న సిద్ధంగా ఉండండి’’ అని నిర్మాణ సంస్థ పేర్కొంది.
ఈ సినిమాలో అనుపమ కథలు చదవడమే కాకుండా రాయడానికి ఆసక్తి కనబరిచే యువతిగా కనిపించనున్నారు. ఇక, నిఖిల్‌ ఫుల్‌ యంగ్‌ లుక్‌లో మరింత జోష్‌ఫుల్‌గా పాత్రలో సందడి చేయనున్నారు. సుకుమార్‌ అందించిన కథతో సూర్యప్రతాప్‌ ఈ చిత్రాన్ని తెరకెక్కిస్తున్నారు. అల్లు అరవింద్‌ సమర్పణలో జీఏ2 పిక్చర్స్ పతాకంపై బన్నీ వాసు నిర్మిస్తున్నారు. గోపీసుందర్‌ స్వరాలు సమకూరుస్తున్నారు. ప్రస్తుతం ఈ సినిమా షూటింగ్‌ శరవేగంగా జరుగుతోంది.
