అక్కినేని నాగచైతన్య, మారుతి కాంబినేషన్‌లో రూపొందుతున్న ‘శైలజా రెడ్డి అల్లుడు’ సినిమా ట్రైలర్‌ రిలీజ్‌ అయ్యింది. మారుతి మార్క్‌ కామెడీ ఎంటర్‌టైనర్‌గా తెరకెక్కిన ఈ ట్రైలర్‌లో ‘నాపేరు చైతన్య ముద్దుగా చైతూ అంటారు’ అంటూ పరిచయం చేసుకున్నాడు నాగచైతన్య. నాగచైతన్యకు జోడిగా అను ఇమ్మాన్యుయేల్‌ నటించిన ఈ సినిమాను నాగవంశీ, పీడీవీ ప్రసాద్‌ ఈ చిత్రాన్ని నిర్మిస్తున్నారు. సీనియర్‌ నటి రమ్యకృష్ణ చాలా కాలం తరువాత అత్త పాత్రలో కనిపించనున్నారు. ఈ చిత్రానికి గోపీసుందర్‌ సంగీతం అందిస్తున్నారు.
డైరెక్టర్‌ మారుతి గత చిత్రాల మాదిరిగానే ప్రేక్షకులకు ఫుల్‌ కామెడీ అందించడానికి సిద్దమయ్యాడు. కామెడీకే పరిమితం కాకుండా విభిన్నమైన కథ, పంచ్‌ డైలాగ్స్‌, ట్విస్ట్‌లతో ఆకట్టుకునే మారుతి ఈ చిత్ర ట్రైలర్‌లోనూ తన మార్క్‌ కనిపంచేలా చేశాడు. వెన్నెల కిషోర్‌, పృథ్వీ కామెడీ పంచ్‌నాపలు పండిస్తున్నాయి. ‘పొగరుతో సాధించలేనిది ప్రేమతో సాధించవచ్చు, ఆవకాయ అన్నంలో కలుపుకొని తినాలి కాని ఎర్రగా ఉంది కదా అని మొఖానికి పులుముకోవద్దు, మీలో పుచ్చకాయంత ప్రేమ ఉందా’ లాంటి కామెడీ డైలాగులు చూస్తుంటే సినిమా చూసిన ప్రేక్షకుడు కడుపుబ్బా నవ్వుకోవడం ఖాయంగా కనిపిస్తోంది. వినాయకచవితి కానుకగా సెప్టెంబర్‌ 13న ప్రేక్షకుల ముందుకు ఈ చిత్రం రానుంది.
