ఒకప్పుడు టాలీవుడ్‌లో తన సన్నని నడుముతో, అంద చందాలతో ఉర్రూతలూగించి కుర్రకారు హృదయాలను కొల్లగొట్టిన గోవా బ్యూటీ ఇలియానా కొన్నాళ్ల పాటు టాలీవుడ్‌కు దూరంగా ఉంటోంది. తెలుగులో దేవుడు చేసిన మనుషులు సినిమా తర్వాత కనిపించలేదు. బాలీవుడ్‌కు పయనమైన ఈ భామకు అక్కడ అవకాశాలు రాకపోయినా అక్కడే ఉండిపోయింది. ఇల్లీ బేబీ మళ్లీ తెలుగు సినిమాల్లో రీఎంట్రీ ఇస్తోందని, ఓ సినిమాలో స్పెషల్ సాంగ్ చేసేందుకు ఒప్పుకుందని వార్తలు వచ్చాయి.
తాజాగా రవితేజ హీరోగా శ్రీనువైట్ల దర్శకత్వంలో మైత్రి మూవీ మేకర్స్ నిర్మిస్తున్న అమర్ అక్బర్ ఆంటోనీ చిత్రంలో ఇలియానా నటిస్తున్నట్లు తెలిసింది. ఈ విషయాన్ని ధ్రువీకరిస్తూ దర్శకుడు శ్రీనువైట్ల ట్వీట్ చేశారు. రవితేజ ఈ సినిమాలో త్రిపాత్రాభినయం చేస్తున్నట్లు తెలిసింది. ఇలియానాతో పాటు ఈ చిత్రంలో శ్రుతిహాసన్‌ను మరో హీరోయిన్‌గా ఎంపిక చేసినట్లు సమాచారం. రవితేజతో ఇలియానాకు ఇది మూడో చిత్రం. గతంలో కిక్, దేవుడు చేసిన మనుషులు చిత్రాల్లో నటించింది.
