బాహుబలి చిత్రంతో వరల్డ్‌ వైడ్‌గా గుర్తింపు తెచ్చుకున్న యంగ్‌ రెబల్‌ స్టార్‌ ప్రభాస్ పెళ్లి కోసం అభిమానులు ఎంతో ఆసక్తిగా ఎదురుచూస్తున్నారు. ‘డార్లింగ్‌’ ను త్వరలోనే ఓ ఇంటి వాడిని చేయాలి అనుకుంటున్నట్లు ఆయన పెదనాన్న, సీనియర్‌ నటుడు కృష్ణంరాజు కూడా ఓ సందర్భంలో చెప్పారు. సరైన వధువు కోసం చూస్తున్నట్లు పేర్కొన్నారు.
అయితే తాజాగా ప్రభాస్ ఓ ఆంగ్లపత్రికకు ఇంటర్వ్యూ ఇచ్చారు. ఈ సందర్భంగా పెళ్లి గురించి ప్రశ్నించగా ఆయన స్పందించారు. ‘అది నా వ్యక్తిగత విషయం. దాని గురించి చెప్పడం నాకు ఇష్టంలేదు, చెప్పాలి అనుకోవడం లేదు. నేను పెళ్లి చేసుకోవాలని నిర్ణయించుకున్నప్పుడు మీడియాకు చెబుతాను’ అని పేర్కొన్నారు.
ప్రభాస్ ‘బాహుబలి: ది కన్‌క్లూజన్‌’ తర్వాత ‘సాహో’ లో నటిస్తున్న సంగతి తెలిసిందే. ఈ చిత్రానికి సుజీత్‌ దర్శకత్వం వహిస్తున్నారు. బాలీవుడ్‌ నటి శ్రద్ధాకపూర్‌ ఈ చిత్రంలో కథానాయిక. యూవీ క్రియేషన్స్‌ సంస్థ భారీ బడ్జెట్‌తో తెరకెక్కిస్తున్న చిత్రమిది. యాక్షన్‌ సన్నివేశాలకు చాలా ప్రాముఖ్యత ఇస్తున్నారు. ఇందులో జాకీ ష్రాఫ్‌, నీల్‌ నితిన్‌ ముఖేష్‌, మందిరా బేడీ, చుంకీ పాండే ప్రధాన పాత్రల్లో నటిస్తున్నారు. వచ్చే ఏడాది ఈ సినిమా ప్రేక్షకుల ముందుకు రాబోతోంది.
