టాలీవుడ్‌ ప్రముఖ కథనాయకుడు మెగా పవర్‌ స్టార్‌ రామ్ చరణ్‌ రంగస్థలం సినిమా తరువాత ప్రస్తుతం బోయపాటి శ్రీను దర్శకత్వంలో ఓ సినిమా చేస్తున్న సంగతి తెలిసిందే. ప్రస్తుతం షూటింగ్‌ జరుపుకుంటున్న ఈ సినిమాలో బాలీవుడ్‌ నటుడు వివేక్‌ ఒబెరాయ్‌ విలన్‌గా నటిస్తున్నాడు. కాగా ఈ చిత్రంలో వివేక్‌తో పాటు మరో విలన్‌ కూడీ కనిపించనున్నాడట. హాయ్‌ సినిమాతో టాలీవుడ్‌కు హీరోగా పరిచయం అయిన నటుడు ఆర్యన్‌ రాజేష్‌, ఇప్పడు రామ్ చరణ్‌ చిత్రంలో స్టైలిష్ విలన్‌గా కనిపించనున్నాడన్న ప్రచారం జరుగుతోంది.
ఇప్పటికే జగపతి బాబు, ఆది పినిశెట్టి లాంటి హీరోలు విలన్‌లుగా చూపించి మెప్పించిన బోయపాటి, రామ్‌చరణ్‌ సినిమాతో ఆర్యన్‌ రాజేష్‌ను విలన్‌ పాత్రలో పరిచయం చేయనున్నాడు. ముందుగా ఈ సినిమాలో ఆర్యన్‌, చెర్రీకి అన్నగా కనిపించనున్నారన్న ప్రచారం జరిగింది. కానీ ఇప్పడు ఉన్న సమాచారం ప్రకారం ఈ అల్లరోడి అన్న నెగెటివ్‌ రోల్‌లో కనిపించనున్నాడని తెలుస్తుంది. చాలా కాలంగా నటనకు దూరంగా ఉన్న ఆర్యన్‌ రాజేష్‌ ఈ సినిమాతో రీఎంట్రీ ఇస్తున్నారు.
