జూనియర్ ఎన్టీఆర్ నటించిన “జైలవకుశ” చిత్రానికి అరుదైన గౌరవం దక్కింది. ఎన్టీఆర్ తొలిసారి త్రిపాత్రాభినయం చేసిన సినిమా ఇది. రాశీఖన్నా, నివేదా థామస్‌ హీరోయిన్లు. ఎన్టీఆర్ ఆర్ట్స్‌ పతాకంపై కల్యాణ్‌రామ్‌ నిర్మించిన ఈ సినిమాకు బాబీ దర్శకత్వం వహించారు. దేవిశ్రీ ప్రసాద్‌ స్వరాలు అందించారు. దక్షిణ కొరియాలో జరిగే (బుచాన్‌ ఇం టర్నేషనల్‌ ఫెంటాస్టిక్‌ ఫిల్మ్‌ ఫెస్టివల్) చిత్రోత్సవంలో ఈ చిత్రాన్ని ప్రదర్శించారు. ఈ చిత్రోత్సవంలో ప్రదర్శితమైన తొలి తెలుగు సినిమా ఇదే. ఉత్తమ ఆసియా చిత్రాల విభాగంలో దీన్ని ప్రదర్శించారు.
ఈ సందర్భంగా చిత్ర బృందం ఆనందం వ్యక్తం చేస్తోంది. గతేడాది సెప్టెంబరులో విడుదలైన ఈ సినిమా మంచి విజయం సాధించింది. బాక్సాఫీసు వద్ద మొత్తం రూ.128 కోట్లు వసూలు చేసినట్లు విశ్లేషకులు అంచనా. ఈ సినిమా తర్వాత ఎన్టీఆర్ త్రివిక్రమ్‌ శ్రీనివాస్‌ దర్శకత్వంలో రూపొందుతున్న ‘అరవింద సమేత’ చిత్రంలో నటిస్తున్నారు. ఈషా రెబ్బా ప్రధాన పాత్రలో కనిపించబోతుంది. ఎన్టీఆర్ సరసన పూజాహెగ్డే హీరోయిన్. మరోవైపు రాజమౌళి మల్టీస్టారర్ మూవీలోనూ నటించనున్నారు.
